الخميس، 14 أبريل 2011

مبادرة طلاب كليات الطب البيطري - مصر

بعد ثورة 25 يناير لاحظت ان فيه اعتصام في بعض كليات الطب البيطري وفي النقابة عشان يااما العميد يمشي او عمل وزارة للطب البيطري وبصرف النظر عن رأيي في المطلبين لكن نفسي تعملوا مبادرة مش هتكلفكم كتير لكن هتكسبكم اكتر

اتمني تعملوا مجموعة من طلبة الكلية وتجمعوا مع بعض ادوية: خافضات حرارة ومضاد حيوي ومضاد التهابات ومضاد لطفيليات الدم ( يعني لو افترضنا هتجيبوا عشر علب من كل نوع ) حاجات بسيطة وتاخدوا معاكم ناس من خامسة او معيدين من الكلية صدقوني لو عرضتوا عليهم هيوافقوا انا عارف ان كل المعيدين جدعان والطلبة كمان بس عاوزين حد يعرض عليهم الفكرة

انزلوا كل يوم رست قرية وعالجوا ببلاش والحاجة اللي محتاجة شغل كبير ابقوا قولولهم يروحوا الكلية في يوم تحددوه

طبعا وسيلة المواصلات ممكن تغلسوا علي دكتور وتقولوله عاوزينك تاخدنا بعربيتك او تتأجروا عربية أو لو فيه تعاون بين الاساتذة في الكلية ممكن تطلعوا باتوبيس الكلية

المبادرة دي مفيدة جدا لكم هتخليكم تقابلوا حالات ممكن متشفوهاش في الفيلد

طيب اللي مش ناوي يشتغل في العلاج بعد اما يخلص هيستفاد ايه

هيستفاد يتعامل مع الفلاحين طيب وهتفيده ازاي دي

هتفيده انه يتعامل مع طبقة مش متعلمة غالبا ودي اصعب ناس ولو نجحت في التعامل معاهم هتعرف تتعامل مع العفريت

هتخليكوا تثقوا في نفسكم اكتر بكتير وتعودكوا علي الاصطدام بالواقع وهتخليكم تحسوا بقيمة الكلية ومش مجرد كلام هتسمعوه من الدكاترة ف الكلية

في الاول والاخر دي ثواب كبير ومش هتخسرك كتير وصدقني الادوية البيطرية مش غالية جدا

ودي هتبقي فرصة توصل الثورة لحد الفلاحين اللي هما محسوش الا بظلم النظام القديم

بالاضافة الي ان دي هتساعد في تدعيم اي مطالب ليكم

يعني بدل اما نكون قاعدين مظاهرات وبس لا احن هنطلع ف الرست ونعمل خير ونصور اللي نعمله ونحطه ع النت ونعلقه ف الكلية عشان نخلي الناس تفكر بشكل ايجابي

انا عارف ان الدعوة دي باذن الله هتلاقي صدي كويس عند ناس كتير ولو محستش انك مش هتقدر تخرج وتعمل كدا كفاية تعرف زملائك بيها لانهم ممكن يكونوا ميعرفوش او معندهمش الشجاعة يعملوها لوحدهم

ربنا يوفقكم جميعا

ارجوكم انشروها