السبت، 4 أكتوبر 2008

* الايفوماك السوبر :

حقنة الايفوماك السوبر دي الحقنة الشعبية الاولى على مستوي الطب البيطري المصري والمعروفة بين اوساط الفلاحين بانها بتنزل الديدان وتشيل القراد وبتقضى على الجرب وبتشيل الغش وبالتالي ياتي العشار وبتخلى جسم البهيم يحلو وبفتح الشهية
م الاخر كده بتاعة كل حاجة
وديما الفلاح يطلبها بالاسم والشاطر يخليها تتحصن دوري
ومن شهرة هذه الحقنة ان الناس عرفت تمنها الاصلي او حتي التقريبي ان الحقنة بحوالي 150 جنيه والمشكلة الاكبر انهم فكرنها 100 سم وبالتالي لو الدكتور قال 3 جنيه يبقي حرامي بياخد الضعف على طول ولو 4 جنيه يبقي يعني الله يسامحه
المهم ان الحقنة دي مشهورة بانها بتلسع البهيم وبتخليه يتنطط ساعة ما يخدها والاخرين يعتقدوا انها بتورم مكانها
ولما كان بعض الاطباء البيطريين اخبث من الفلاح فعملوا ايه ياجماعة
طبعا كلكم عارفين حبيب الملايين النصرومكتين ودا يعتبر من ارخص انواع الايفوماك العادة - ومن وجهة نظري من افضلها - فيقوم الطبيب البيطري الخبيث بملئ حقنة الايفوماك السوبر البلاستيك بنصرومكتين طبعا النصرومكتين بحوالى 4,5 جنيه ايام ما كنت فى مصر يعني ببلاش والدكتور يحقن السم بـ 3 جنيه او حتي بـ 2,5
طبعا النصرومكتين فيه مشكلتين انه فى الغالب مبيلسعش - وان كان بيلسع فى بعض الاحيان - فعشان كده الدكتور عاوزه يلسع فبعد ما يدي الحقنة يدلك الجلد مكان الحقنة والحيوان غصب عنه هيتلسع
المشكلة التانية حكاية انه مبيورمش مكانه وطبعا عند الطبيب الخبيث ليها حل انه يخلي الحقنة تجي فى العضلات بحيث نص سم يجي فى العضلات وبالتالي هتورم وان كان دا ممكن يسبب sterile abcess بس دا مبيحصلش فى الغالب
طبعا النصرومكتين مبينزلش القراد ومبينفعش فى الديدان الكبدية
بس على مين اللي ضميره مات الله يرحمه

* الست عييت من تمن الدوا :

كان فيه حالة - بقرة - وكان فيه التهاب حول الحافر من خبطة والحالة كانت بتعرج على رجلها وكان صاحب الحالة متضايق م الموضوع ده
المهم انا حاولت معاها بالمضاد الحيوي ومضاد الالتهابات الخفيف والتراي بي ووضع الرجل فى كبريتات النحاس اللامائية الزرقاء فى المياه بس كان التحسن ضعيف
وعشان كده قررت استعمل العلاج اللي م الاخر
حبيب قلبي الفينادين وكتبت 7 سم فينادين وشوية حاجات مضاد حيوي كويس وشوية ادوية بشري المهم رحت اخر النهار على اساس يكونوا جابوا العلاج
ولقيت مراة الراجل شكلها عيان وتعبانه خالص
قلتلها الف سلامة انتي تعبانة ولا ايه
قالت يادكتور مش حرام عليك تكتب حقنة واحدة بـ 70 جنيه
فانا ضحكت وقلت : انتي رحتي للدكتور فلان
قالت : اه
قلتلها : طيب جبتي الادوية البشري
قالت : انا اما رحت للبيطري ولقيت حقنة واحدة بـ 70 جنيه خفت اروح للصيدلية البشري
قلتلها : خلاص الموضوع كذا كذا كذا والسم تمنه من 3,5 لـ 4 جنيه مش بـ 10 جنيه
والله ياجماعة الدم رجع لوشها
شوفوا ظلم الدكاترة زملائكم ظلم الانسان لاخيه الانسان

* سم الفينادين بـ 10 جنيه :

فى يوم من الايام كنت طالع حالة حمي فى عجل ولقيت حرارته عالية
وبالنسبة لحبي الشديد فى الفينادين وثقتي الزائدة فيه فكنت احب اكتبه على الرغم من سعره الغالي بالنسبة للفلاحين الغلابة للي كنت بتعامل معاهم
فكتبت للعجل 3 سم فينادين وراح الراجل جاب الفينادين افندي
ولقيت الراجل جاي مكشر عن انيابه وبيقولى هي الحقنة دي غالية اوي كده ليه انا طبعا قلت الفلاح مستغليها عشان بـ 10 او 12 جنيه
والفلاح قال دا الدكتور عمال يشكر فيك ويقول الدكتور عادل دا كويس وشاطر وحاجات كده وبعتلك الكرت دا وبيقول خليه يتصل بيا ضروري
انا ببص ع الكرت لقيت الدكتور فلان - بتاع القصة الاولانية - كاتب 3 × 10 = 30 فسئلت الراجل هو السم بكام قال السم بـ 10 جنيه
انا صراحة استغربت جدا من الجشع الشديد
بس المرة دي كان فينادين
والله مرضتش ادوقه عشان اعرف اصلي ولا تقليد
وحسبي الله ونعم الوكيل

* الاوكسي بدل الفينادين :

* الاوكسي بدل الفينادين :
كنت قاعد يوم فى الصيدلية البيطرية بتاعتي ومتابع مسلسل اجنبي كنت بحب اسمعه وفجأ دخل على واحد
وقاللي : والله يادكتور تيجي تشوف عندي خروفة تعبانة جدا
قلتله : هاتها
قال : دا انا شاريها النهاردة وانا كنت هجيبها بس هي نايمة ومش بتقف خالص
بجد انا صعب عليا الراجل وبخاصة انه لسه شاريها وياعيني لسه مفرحش بيها
قلتله : خلاص خد الشنطة وانا جاي وراك ورحت للحالة - القصد - لقيت الحالة ياعيني نايمة ع الارض وبتنهج بصوت عالي ولقيت صدرها تعبان جدا المهم حسيت ان الحالة متأخرة - وانا فيا عيب - بحب الصراحة زيادة عن اللزوم
قلتلهم: والله الحالة دي تعبانة خالص وبجد انا مش اقدر اقولكم انها ممكن تطيب الا برحمة ربنا ودي حاجة اتعلمتها من دكتور زميلنا اكبر مننا بيقول ايه بقي " ديما حاول تحسس صاحب الحالة انها فى النزع الاخير عشان لو ماتت ميلومكش ولو عاشت يقول الدكتور دا شاطر انقذها " بس انا للاسف مبقدرش اطبق نصيحته الا فى الحالات التعبانه قوي ولكن فى الحالات اللي فيها امل بحب ابشر صحبها عشان يقول الدكتور دا فال خير مش دايما يقولوا الدكتور دا عنده كل الحالات ميته وتعبانه
المهم ياجماعة انا بحب فى الحالات بتاعتي اني اجيب م الاخر - يعني احب اكتب افضل ادوية فى الحالات اللي م الاخر - فكتبت مضاد حيوي قوي والله انا مش متذكر ايه هو - بس تقريبا سيفوتاكس 1 جم - وباي سيلفون - وهتلاحظوا طبعا اني بحب اكتب ادوية بشري يمكن عشان فعالة وجربتها كذا مرة ونتيجتها حلوة اوي - وكتبت مضاد التهابات بيطري فينادين - بتاع شيرنج - طبعا كلكم عارفينه
وخليت الراجل يروح يجيب الدوا بسرعة لان المكان اللي كنت فيه مفيهوش صيدليات بشري وكمان انا مكنتش احب اجيب الادوية الغالية ف الصيدلية المهم رحت اكمل المسلسل الاجنبي وبعد نص ساعة رجع الراجل ومعاه الدوا المهم رحنا ع البيت وطلعنا الدوا وببص فى الدوا - طبعا انا كنت كاتب 2 سم فينادين - وطبعا زي ما انا عارف الفينادين الاصلي لونه ابيض زي المياه وطعمه سكر جدا لدرجة انه لو جاء على لسانك هيتعبك جدا من كتر السكر اللي فيه - سكر لاذع - واشوف اللي الراجل جايبه لقيت سائل اصفر بقيسه فى الحقنة لقيته 4 سم وطبعا انا لغاية اخر يوم كنت فى مصر كان الفينادين لونه ابيض وحتي الفلوندين او اي منتج بديل لونه ابيض وطعمه سكري لاذع الاصلي لاذع اكتر والتقليد تحس ان السكر خفيف
وطبعا هتقولوا ازاي عرفت موضوع الطعم اقولكم ساعة لما كنت بفرغ الحقنة من الهواء كان بعض القطرات ممكن تتساقط على فمي وبعد كده ادمنت الموضوع بتاعى التذوق - طبعا انا بهزر .
وطعم التيراميسين مر علقم وطبعا انا مكدبتش خبر ودوقت الطعم لقيته مر علقم عرفت ان الدوا اللي متعبي تيراميسين قلت يمكن غلطة مطبعية من الدكتور
وسالت الفلاح امال الدوا دا بكام قال دا ب 8 جنيه على اساس ان السم ب 2 جنيه طبعا الفينادين كان السم فيه ب 3,5 او اربعة جنيه
وسالت جبت منين الدوا
قال من الدكتور فلان
قلت طيب روح رجع الدوا دا وقله الدكتور مش هناك ومش عارف حد يدي الحقنة دي
شوفوا الخباثة
بس الخباثة بغباء

حركات البيطريين الخبثاء

احب ان احكي لكم عن تجاربى مع الاخوان البيطريين فى الفيلد - طبعا كلنا نعلم ان اي مجال فيه الصالح والطالح والطيب والخبيث - وهذه بعض التجارب :